الى الامام علي ( عليه السلام )
.
.
.
قارنتك علي وية اليحكمون
ولكيتك يا علي مفرط بالاحكام
شنو تحكم الدنيا وعرشك ابساط
وشنو بجامع مقر القائد العام
وشنو عود اليتيم يكظلك الباب
اليتيم يروح يسكن دار الايتام
جا ما عادها ولا كظلك الباب
كون بصدرة قمبر ساحب اقسام
كلشي يصير مدري يفخخ البيت
تحت مهرك يجوز يحطلك الغام
تكظي الليل تفتر وانت مسؤول
السياسي الزين كون المغرب ينام
بين الناس تخطب لا يبو حسين
علي المفروض تخطب من ورة الجام
كثر نوك واطلع موكب وياك
وانشر عل الدرب رماية اسهام
ناكة مضللة وتركبها ابو حسين
وعمار ابن ياسر كعدة كدام
وخل مالك الاشتر قبلك يفوت
يكطع كون سير الشارع العام
بدولتك هم جنت تنجر مشاريع
وهم تاخذ مقابل بصمة ابهام
فضة وقمبر شكد يا علي انطوك
حتى اتعينو بالبيت خدام
عقيل شراد منك حتى تجوي
اخيك هاذ ضمة لظهرك حزام
قبل ماكو دمج وادمجة مولاي
علي سجلة سياسي مهدم الاصنام
شعجب ولدك علي ما طلعو ايفاد
دزهم عل البحر يكظولهم عام
دبرلهم عذر خلهم يصيفون
بحجة مشو دورة بنشر الاسلام
علي تنطي الخبز وجهك تغطي
جا ما كشفت وجهك للاعلام
جان ما صار بينا الصار مولاي
وضل ياهو اليجي وكال انا ابو الثام
.
.
.
.
طبعا قصيدة رائعة جدا عجبتني وحبيت تشوفوها ولو هي مقارنة خسرانة بين سياسيين هذا الوقت وبين علي ابن ابي طالب ( عليه السلام ) بس تكشف اشياء حلوة شلون كان الامام وشلون السياسيين هسة
للشاعر نهاد الخيكاني
مع اجمل تحياتي