هاك اخذ محبرتي واقلامي الشليل
هاك اخذ دفتر اشعاري وترجمه
اخذ شمات الهوه وعندك دخيل
هاك اخذ روحي العليله معلمه
هام كلبي الصار بفراكك عليل
وهاي عيني من البواجي مسلهمه
هاك عيني المارضت غيرك خليل
ريت عيني خلاف عينك بالعمه
هاك اخذ دمعي ولك سويه سبيل
واروي كلمن عاف خله وخاصمه
هاك شوف شسوه هجرك بالدليل
كطعه وماعندي ادين تلملمه
سلمت عمري ضعن وانته الدليل
ليش ضعنك للذياب تسلمه
يالبنيتك قلعه ما ردتك تميل
بجلمه لن بنياني ذاك تهدمه
يالشلتك عود يابس بالجحيل
ومنتظر عودك لمن طك ورمه
وضاع تعبي وياك والوادم تجيل
وفرهدك مني الوكت بالموزمه